SAS PREDAS TUAS BELLAS…
Sas predas tuas bellas,caru Sciola,
De basartu nieddu, predas duras,
sunu armoniosas isculturas
chi onoran su zeniu ‘e sos sardos,
predas chi t’an abertu traguardos
de fama eterna che Ciusa e Nivola.
Brussos d’atarzu e rios de suore
Fachen ballare a corfos de marteddos
Lùchidos, temperados iscarpeddos
Pro dare a cussas predas, che a isfida,
formas perfetas chi totu sa vida
andaìas chircande chin amore.
A poi ‘e cussas predas, sas chi dana,
si las toccas appenas chin sas manos,
sonos armoniosos e arcanos,
ecco s’opera ‘e arte, a dimustrare
chi tanta zente est disposta a ti dare
una perra ‘e pane … cando l’ana!
Custu semene mannu e de valore
De custu artista chi no at cumpanzu,
est innu a sa bontade, est unu afranzu,
est un’etada ‘e manu in su bisonzu
est sinnale ‘e amore e distimonzu
de sos chi dan consolu in su dolore.
Est una este ‘e pannu a chie est nudu,
est unu ticu ‘e abba a su sidìdu
est pipinida ‘e pane a su famìdu,
lemusina retzida e regalada
e d’est, a dolu mannu, iscavanada
pro un’istadu chi negat s’azudu!
Est un’astrinta ‘e manu sentza ingannu,
est unu raju ‘e sole in sa traschìa,
e d’est mare ‘e amore … a finitìa,
chi tue as iscurpìdu, amicu meu,
e cantu so cuntentu, l’ischit Deu,
de esser abba in cussu mare mannu!
Ah, cantu est bellu ancora a caminare,
in custu mundu prenu ‘e farzos deos,
a fiancos de tantos “Zireneos”,
cuntentos solu ‘e si ponner a pala
sa ruche de sos frates, ruche mala,
però capassa ‘e si facher amare!
SANTINO MARTEDDU
Siniscola, 27 febbraio 2011
La Piazza della Solidarietà
